தேசிய ஆயுள்வேத பாதுகாப்பு சபை வலுவூட்டல் வேலைத்திட்டத்துடன் இணைந்து யாழ்.மாவட்ட ஆயுள்வேத பாதுகாப்பு பேரவையின் அங்கமாக விழிப்புணர்வு நிகழ்ச்சி ஒன்று நடத்தப்பட்டது. இம்முயற்சி பாரம்பரிய மருத்துவத்தைப் பாதுகாப்பதையும் பாரம்பரிய மருத்துவர்களின் வாழ்வாதாரத்தை மேம்படுத்துவதையும் நோக்கமாகக் கொண்டுள்ளது. இந்த நிகழ்ச்சி 2025 பெப்ரவரி 13-14 தேதிகளில் யாழ்ப்பாணம் அச்சுவேலி மருந்து உற்பத்திப் பிரிவு மற்றும் அச்சவேலி மூலிகைத் தோட்ட வளாகத்தில் இடம்பெற்றது, அதனைத் தொடர்ந்து 2025 ஆம் ஆண்டு பெப்ரவரி 15 ஆம் திகதி மன்னார் நகரப் பிரதேச செயலகத்தில் பாரம்பரிய வைத்தியர்களின் பங்களிப்புடன் மற்றுமொரு அமர்வு இடம்பெற்றது.
ஆயுள்வேத மருந்துகளின் பாதுகாப்பு மற்றும் தரத்தை உறுதி செய்தல், மருந்து தயாரிப்பதற்கு தேவையான சரியான பொருட்கள் மற்றும் பதிலீடுகளை கண்டறிதல், மருத்துவ தாவரங்களை பயிரிடுதல் மற்றும் அறுவடை செய்வது தொடர்பான சட்ட மற்றும் தொழில்நுட்ப தேவைகளை புரிந்துகொள்வது, நீடித்த ஆயுள்வேத பயிற்சிக்காக மூலிகை தோட்டங்களை திறம்பட பராமரித்தல் உள்ளிட்ட பல்வேறு அம்சங்களில் பங்கேற்பாளர்களுக்கு பயிற்சி அளிக்கப்பட்டது.
மேலும், கிளிநொச்சி கல்மடுநகர மூலிகைத் தோட்டத்தில், வடமாகாணத்தில் உள்ளுர் மருத்துவ ௨ற்பத்திக்கு தேவையான மருத்துவச் செடிகளை வினைத்திறன் மிக்க முறையில் பயிரிடுவது தொடர்பாக நிறுவனத் தலைவர்களுடன் கலந்துரையாடல் ஒன்று இடம்பெற்றது. பொதுமக்களுக்கு பகிரப்பட்ட பராமரிப்பு சேவைகளை விரிவுபடுத்துவதற்கும் ஆரோக்கியமான சமூகத்தை மேம்படுத்துவதற்கும் வழிகளை ஆராயும் மற்றுமொரு கலந்துரையாடல் வடமாகாண சுகாதார அமைச்சில் நடத்தப்பட்டது. மாகாண சுகாதார செயலாளர், மாகாண சுகாதார சேவைகள் பணிப்பாளர் மற்றும் சுதேச வைத்திய பிரிவின் பணிப்பாளர் (அபிவிருத்தி) உட்பட முக்கிய அதிகாரிகளின் பங்கேற்புடன் எதிர்கால திட்டங்கள் குறித்தும் கலந்துரையாடப்பட்டது.
